20.10.2023 жылы Абай атындағы Жамбыл гуманитарлық жоғары колледжінің «Филология» ПЦК-сы оқытушыларының ұйымдастыруымен Мағжан Жұмабаевтың 130 жылдық мерейтойына орай ұлттық құндылықтарды дәріптеу, Мағжан Жұмабаевтың педагогикалық және әдеби мұрасын зерделеу мен оның идеяларын қазіргі білім беру жүйесінде жүзеге асыру мақсатында «Мағжан Жұмабаев мұрасы және ұлттық руханият» тақырыбында облыстық ғылыми-практикалық конференция өтті.
Техникалық және кәсіптік білім беру ұйымдары педагогтерінің қатысуымен өткен бұл конференцияға облыстың Жамбыл политехникалық жоғары колледжі, «Тараз-Ғасыр» колледжі, Тараз сервис және технология колледжі, «Астана» көпсалалы колледжі, Жамбыл индустриалды- технологиялық колледжі, Абай атындағы Жамбыл гуманитарлық жоғары колледжінен т.б келген оқытушылар «Алаш әдебиеті және Мағжан Жұмабаев», «Мағжан шығармаларындағы түркішілдік сарын», «Мағжанның «Педагогикасы» және ұлт тәрбиесі» бағыттары бойынша мазмұнды баяндамалар оқып, өз тәжірибелерімен бөлісті. Конференция жұмысының соңында талқылау өткізіліп, оқылған баяндамалар мен айтылған пікірлер негізінде маңызды ұсыныс-тілектер айтылды. Баяндамашылар алғысхаттармен марапатталды.
