21.11.2025 ж. Жамбыл облысы әкімдігінің білім басқармасының «Техникалық және кәсіптік білім беруді дамыту орталығы» КММ, Абай атындағы Жамбыл гуманитарлық жоғары колледжінің ұйымдастыруымен Бауыржан Момышұлының 115 жылдығына орай техникалық және кәсіптік білім беру ұйымдарының студенттері арасында «БАУЫРЖАН МОМЫШҰЛЫ ЖӘНЕ XXI ҒАСЫР ЖАСТАРЫ: РУХ, ЖАУАПКЕРШІЛІК, ТӘРТІП» тақырыбында облыстық ғылыми-теориялық конференция өтті.
Конференцияның мақсаты – халық қаһарманы, ұлт мақтанышы, даңқты қолбасшы, майдангер-жазушы Бауыржан Момышұлының өмірі мен шығармашылық мұрасын жан-жақты зерттей отырып, оның патриоттық, ерлік, адамгершілік және рухани құндылықтарын жастар санасына сіңіру; студенттердің тарихи санасын, елжандылық сезімін қалыптастыру арқылы ұлттық рухты көтеру, сондай-ақ олардың ғылыми-зерттеу мәдениеті мен шығармашылық әлеуетін арттыру.
Конференцияға қатысқан қонақтар мен қазылар алқасының құрамы:
- Демешов Құрманғазы Мыңжасарұлы - Жамбыл облыстық тарихи-өлкетану мұражайына қарасты «Даңқ» залы «Б.Момышұлы» мұражайының меңгерушісі;
- Алдабеков Жазылбек Рахманбердіұлы мен Қырықбай Құндыз Болатқызы - Жамбыл облыстық тарихи-өлкетану мұражайына қарасты «Даңқ» залы «Б.Момышұлы» мұражайының ғылыми қызметкерлері;
- Амангелдиева Айжан Әсембекқызы - Бауыржан Момышұлы атындағы №45 қазақ классикалық гимназиясының қазақ тілі мен әдебиеті пәнінің мұғалімі, педагог-зерттеуші; Баялиева Айжан Жанатбайқызы – Абай атындағы Жамбыл гуманитарлық жоғары колледжінің қазақ тілі мен әдебиеті пәнінің оқытушысы, педагог-сарапшы, «Үздік педагог-2025» атағының иегері;
- Мирзахметова Жанна Мусавалиевна - Жамбыл индустриалды-технологиялық колледжінің орыс тілі мен әдебиеті пәнінің оқытушысы;
- Бейсенбаева Айман Ораковна - Жамбыл жоғары медициналық колледжінің орыс тілі мен әдебиеті пәнінің оқытушысы;
- Темиргалиева Айсулу Кахармановна - Мектеп олимпиадаларын және мектептен тыс іс-шараларды өткізетін облыстық орталықтың орыс тілі мен әдебиеті пәнінің оқытушысы.
Конференция «Бауыржан Момышұлы – ұлттық рух пен ерліктің символы» және «Момышұлы мұрасы – жастар тәрбиесінің негізі» тақырыбындағы екі бағытты қамтыды. Бірінші секция қазақ тілінде екінші секция орыс тілінде жүргізілді.
Конференцияға Жамбыл облысының Техникалық және кәсіптік білім беру ұйымдарынан 60-қа жуық ғылыми жұмыс келіп түсіп, олардың ішінен 34 студент іріктеліп, өз жұмыстарын қорғады. Қазылар алқасының шешімімен мазмұнды баяндамалар ішінен үздік деп танылғандар І, ІІ, ІІІ дәрежелі дипломдармен марапатталды, ал қалған қатысушыларға сертификат табысталды.
Конференцияның қорытындысы:
І секция (қазақ тілі): І дәрежелі дипломды №3 Байзақ колледжінің студенті Алтынбекұлы Нұрасыл, ІІ дәрежелі дипломды Абай атындағы Жамбыл гуманитарлық жоғары колледжінің студенті Сайлаухан Айнара, ІІІ дәрежелі дипломды Жамбыл политехникалық жоғары колледжінің студенті Саттибаева Инабат иеленді.
ІІ секция (орыс тілі): І дәрежелі дипломды Абай атындағы Жамбыл гуманитарлық жоғары колледжінің студенті Алиаскарова Айя, ІІ дәрежелі дипломды Абай атындағы Жамбыл гуманитарлық жоғары колледжінің студенті Рябова Полина, ІІІ дәрежелі дипломды «Парасат» жоғары колледжінің студенті Аксимбаева Арай иеленді.
